Mina Touro – O Pino NON

A escasas dúas semanas de que remate o tempo no que o proxecto mineiro está en exposición pública non chegan nin as mans, nin o tempo para alegar, informar e facer valer os nosos dereitos.

Esta semana presentamos un escrito ante a Valedora pedíndolle a súa intercesión ante a Consellería de Economía e Industria para que se publique un novo Acordo que someta a información pública o proxecto presentado por Cobre San Rafael. Un texto no que os datos dos bens e dereitos afectados aparezan sen erros nen omisións, que atentan contra o dereito a unha información veraz e completa das persoas e comunidades directamente afectadas e deixanas na indefensión. Consideramos que a documentación actuamente en exposición pública deturpa o preceptivo proceso de información pública por descoñecer, debido a eses erros e ocultacións, datos substanciais susceptibles de alegacións. (Máis información na prensa, aquí, aquí, ou aquí)

Aparte dos erros e omisións en relación aos bens e dereitos afectados pola explotación e subsceptibles de seren expropiadados da que alertabamos aquí, hai documentos en exposición pública que están en branco, como son o Informe de Solvencia Económica e Financeira ou o Informe de Solvencia técnica da empresa. Ambos deberían conter información substancial para valorar o proxecto. Non só por coñecer a capacidade da empresa para levar adiante o seu proxecto de explotación da mina, senon para coñecer as garantías económicas, financeiras e técnicas que garantan a adecuada asunción de responsabilidades no caso de prexuízos para o medio ambiente como consecuencia (ou non) de accidentes. Basta recordar o sucedido cando reventou a balsa de residuos mineiros de Aznalcóllar: durante moitos anos intentouse levantar o “velo societario”, é dicir, responsabilizar a empresa matriz (Boliden) do accidente sucedido mentres a mina era explotada pola súa filial (Boliden Apirsa), pero case 30 anos despois aínda non se conseguíu.

Para difundir os impactos do proxecto entre a veciñanza da contorna , esta semana levaronse a cabo actos informativos en Piloño (Vila de Cruces) e en Visantoña (Santiso). Este último, organizado polo colectivo Santiso Vivo, contou ademáis coa presenza da PDRA, Plataforma en defensa da ría de Arousa, e da asociación ecoloxista ADEGA. A mina de Touro-O Pino e ALTRI son dúas caras da mesma moeda, a da grave ameaza ao territorio.

Esta semana tamén nos reunimos cunha representación de parlamentarios do BNG, presididos por Ana Pontón, aos que lle transladamos a nosa inquedanza ante o proxecto presentado para a reapertura da mina. Un proxecto, no esencial, idéntico, o que procedía era a inadmisión do mesmo en aplicación da lexislación de avaliación ambiental. Ana Pontón expresou a concidencia total do Grupo Parlamentario do BNG cos posicionamentos da Plataforma, sinalando que o BNG, neste asunto mantén a a mesma posición que no 2017, que non mudou, como non mudou o proxecto. Animounos a continuar traballando na defensa dos nosos dereitos e lexítimos intereses. Estamos á espera de fixar data para unha reunión co grupo parlamentario solicialista, mentres que nin o grupo parlamentario popular, nin o mixto (Democracia Ourensana) nos responderon aínda .

Esta semana tamén saímos a rúa, a poñer mesas informativas e facilitar a recollida de alegacións en diferentes feiras da contorna: Boiro, Vilagarcía e este domingo 19, campeando o temporal, en Padrón.

Mobilización veciñal a fume de carozo! Achégate, infórmate e alega (alegacións dispoñibles neste enlace) , entre tod@s temos que facerlle fronte!.