A veciñanza vén de presentar recurso de alzada contra a autorización de Augas de Galicia ao Proxecto de drenaxe temporal dos regatos Portapego, Felisa e Angumil na contorna da vella mina de Touro, do mesmo xeito que outras organizacións, como Adega e PDRA (Plataforma pola Defensa sa Ría de Arousa).
Este proxecto presentouno aló por xaneiro de 2019 Explotaciones Gallegas S.L, a empresa titular dos terreos dende principios dos anos 90. Eso si, foi presentado a instancias da Xefatura Territorial da Consellería de Economía Emprego e Industria, non por vontade propia da empresa de asumir o tratamento adecuado para os pasivos medioambientais da vella mina, e pon de manifesto a deficiente xestión que se estivo a facer deses pasivos ambientais ao longo de todos estes anos.
As alegacións iniciais a este proxecto xa foran achegadas á Administración en febreiro de 2019 , cando se presentou, e reiteradas en xaneiro de 2020 cando se notificou un informe técnico no que se informaba favorablemente. Malia a todo, o procedemento administrativo continuou o percorrido ata recibir a finais de outubro de 2020 a autorización por parte de Augas de Galicia, resolución que agora se recorre en alzada.
A veciñanza non pode concordar co proxecto nos termos que está presentado. Dunha banda, trátase dunha medida temporal, uns 6 meses, sen indicar que ocurrirá unha vez superado ese horizonte temporal. Doutra banda, non aborda o problema: para evitar que as drenaxes contaminadas dos regatos Portapego, Felisa e Angumil cheguen ao dominio público hidráulico plantéxase recoller as súas augas e bombealas á balsa de Vieiro, que é unha antiga corta mineira inundada.
Non se concreta tratamento que corrixa a hiperacidez desas augas bombeadas nin a súa carga en metais pesados. Polo tanto, o único que se vai conseguir é mover as augas contaminadas dun lado a outro da antiga explotación mineira, agravando aínda máis a contaminación da balsa de Vieiro. Agravaríase tamén a afección sobre o regato Pucheiras, tributario do Brandelos, que ao bordear esa balsa sofre xa importantes problemas de contaminación. As augas acabarían alcanzando o dominio público hidráulico por estoutra vía.
Non podemos obviar o sinsentido da “solución temporal” que se autoriza: facer “desaparecer” os regatos contaminados no canto de abordar seriamente a súa contaminación, ou presentar un proxecto temporal cun ridículo horizonte de apenas 6 meses cando a empresa tivo 30 anos para abordar o problema.
En definitiva, calquera proxecto que se autorice para o control e tratamento das augas contaminadas ha de proveer unha solución completa, para tódolos lugares polos que se están producindo esas saidas de augas contaminadas de xeito que se garanta a non afección ao dominio público hidráulico.
Categorías:mina touro o pino non
Mina Touro - O Pino NON 
2 Comments